Historie

D’n oorsproonk vaan wat later de Zaaten Ingel is gewore ligk daan oach beij de famfaar, en wel de zomerkèrremis (Sint Jaan) in 1971. Famfaar Zjuliana had zjus häör mètwèrreking verlient aon de jaorlikse persessie, boe nao ’n aontal luij ut nudig voonte (neet zoe es gebrukelik waor um nao hoes tow te goon en aon te zitte aon ut door moeders de vrow mèt väöl leefde bereijde kèrremisdiné) ut echte Spätsjoppe op de enige echte tot oetvoering te bringe. Um ’n oor of 5 dee middag waor bliekbaar zoe väöl aon Bachus geofferd, dat Sint Barbara (Berbke) de petroensheilige vaan de blaosmeziek versjeen en us opreep om häör ’n ode te bringe. De ierste Zaaten Ingelkes trokke de populiere-weeg op tot aon ut kèrremisterreien terögk naor de kaffee vaan Misjèl en Nèt Brands aonder de toene vaan: “Wie sjoen òs Limburg is” en “Mestreech is neet breid mèr laank.”
De ierste Ingelkes waore Nico van Hees met e trummelke, Tonnie Theunissen, alias “de kleine linkse mèt un sjuiftrombon en Michael Maes, alias “de sjele” mèt un trompöt. (Heer heet noe kontaklense red.) De aandere dörrefde bliekbaar neet en zien daan ouch beij de ierste sjifting aofgevalle. Dee zèllefden daag woorte planne gemaak um in de Vastelaovestied te goon optreije in ut belang vaan de Lummelse Vastelaovend. De waorte aander luij benaderd, te weite Wilma Nelissen (Bietringk), Loe Theunissen (deepe trom), Math Cobben (tamboermaitre), Jean-Pierre van den Boogaard (euverslaag).
Later is de bezétting eksplozief oetgegreujd door ledewervingsakties beij ut J.O.W. in ut Keplaon Lochtmanhoes. Unne maan, dee us altied un hand bove de kop heet gehawwe teijdens us jeugdige oonbezörrigheid is uzze eijnige echte Pa Beijer, unne maan dee noe nog altied eve aktief is in ut geve vaan gooje raod.
In dei twie kier èllef jaor is unnen hielen haop veranderd beij de Zaaten Ingel. Ut begòs allemaol mèt tieners in (of net oet) de puberteit op zeuk naor hun eige identiteit. De vergelieking mèt de heijdige late dertigers en vreug veertigers geit kompleet maank. Net zoe es beij eerder aander vereijniging heet de Zaaten Ingel z’n ups en downs gekint. Este terögk kieks in die 22 jaor daan zuuste tot tieners goon vreije, trowwe karrière make, kinder kriege, ziech verantwoordelik gaon veule veur hun femilie en oeteijndelik in ut ziech vaan “de veertigjaorige” aon hun twiede jäög beginne. Dat is daan ouch de verklaoring tot de Zaaten Ingel op dit memint kerngezoond is. Ut kint neet kepot! Ouch de meziek is gans aanders gewore. Teijdens de viering vaan us ierste zjubileij, èllef jaor geleije sjreef unne reporter in de Limburger: “Zaaten Ingel werd dorpskapel.” Want in deen tied woorte zellefs krezendo’s, dekrezen-do’s en retenu-to’s gemaak en woort ut versjèl huurbaar tösse döbbele piano en fortissimo. Un jaorliks terögkkie-rende aktiviteit waor op kèrremiszoondag ut “Plats-konzèr”, boe veer väöl rippetisies veur nudig hadde. Uzze meziek vaan noe is mie geriech op ut in “eks-tase” bringe vaan de towhuurders. De kins d’r neet stil beij blieve stoon, ofste noe wèls of neet. Dat is puur de verdeenste vaan uzze huijdige muzikale leijder, Huub Kleijnen. Heer stik daor hiel väöl tied en innderzjie in en heer deit dat mèt volle euvergave. Este um diech heen kieks daan zuuste tot de zaate herremeniekes wie paddesteul oet de groond zien gekaome, mèh nao ’n aontal jaore oetsjeijde mèt bestoon. Ut zien alleijn de stèrreke die euverleve en dit geit alleijn mèt de steun vaan un aontal luij, die in de euverlevingskanse vaan zoe ’n vereijniging geläöve. Zoonder iement te kort te doen vin iech, tot d’r ’n aontal genump mage weurde, die òs in gooj en in slechte teije door dik en dun gesteunt höbbe. Loe Theunissen, Tonnie Theunissen, Lenie Kleijnen, Huub Kleijnen, Laurent Hamaekers, Herman Prein, Annelies Kleijnen, Wum Beijer sr. En de veurzitster vaan ut ein kier èllef jaorig zjubileijkommitee, Lizette Hendriks. Dees luij höbbe un bestuurlike, of ’n kartrèkkersrol in us vereijniging vervuld. Zoe wie zoe dèks mèt dees gelegenhede beij ut neume vaan naome, kinste iement vergete. Es dit gebäört is, daan heij veur mien ekskuses.
Ut huijdige bestuur oonder leijding vaan Jean Muijtjens heet ut good begrepe en d’n aonzat gegeve mèt de vörreming vaan e zjubileijkommitee veur e groets fies bei jus twie kier èllef jaorig bestoon. Veer zalle us aongenaom laote verrasse doot utgene wat dit kommitee inein gefisternölt heet. Ut zjubileijkommitee, bestaonde oet Math Cobben, Frans Ravesteijn, Jan Soentjens, Tonnie Theunissen en Peter Kleijnen wèl iech hiel hartelik bedaanke veur hunnen inzat en innerzjie. D’n hoop oetsprekend, tot EEDEREIN, dee um welleke persoenlike reije daan ouch zien lidmaotsjap teijdens die 22 jaor zien lidmaotsjap heet opgezag, same mèt us nog ‘ns awwerwèts fies kump viere, wèl iech zègke tot veer ut allemaol same höbbe gedoon, eederein is en bleijf unne bouwstein vaan de vereijniging. Waore die bouwstein d’r neet gewees, daan waor ut gebouw (De Zaaten Ingel) mesjien ineingestort.